الفساد السياسى

سأل طفل والده : ما معنى الفساد السياسي فأجابه : لن أخبرك يا بني لانه صعب عليك في هذا السن ،لكن دعني أقرب لك الموضوع

انا اصرف على البيت لذلك فلنطلق علي اسم الرأسمالية

و امك تنظم شؤون البيت لذلك سنطلق عليها اسم الحكومة

و انت تحت تصرفها لذلك فسنطلق عليك اسم الشعب

و اخوك الصغير هو املنا فسنطلق عليه اسم المستقبل

اما الخادمة التي عندنا فهي تعيش من ورائنا فسنطلق عليها اسم القوى الكادحة

اذهب يا بني وفكر عساك تصل الى نتيجة و في الليل لم يستطع الطفل ان ينام .. فنهض من نومه قلقآ و سمع صوت أخيه الصغير يبكي فذهب اليه فوجده بل حفاضته ذهب ليخبر امه فوجدها غارقة في نوم عميق ولم تستيقظ ، و تعجب أن والده ليس نائما بجوارها فذهب باحثآ عن أبيه فنظر من ثقب الباب الى غرفة الخادمة فوجد أبوه معها

و في اليوم التالي قال الولد لابيه : لقد عرفت يا أبي معنى الفساد السياسي فقال الوالد: وماذا عرفت قال الولد : عندما تلهو الرأسمالية بالقوى الكادحة وتكون الحكومة نائمة في سبات عميق يصبح الشعب قلقا تائها مهملاً تماماً و يصبح المستقبل غارقا في القذارة

المركب بتغرق يا قبطان

معرفشى ليه إفتكرت الجمله ديه وانا بتفرج على أخبار إضرابات المحله والجنان إللى بيحصل هناك, المركب بتغرق يا قبطان, المركب بتغرق يا قبطان, سكوووووووووووووووت تااااااام ولخبطه, ثم يعاود صاحب الصوت فى حصرة متناهيه ويقول: المركب غرقت يا قبطان.

تخيل كدة معايا بقى وحضرتك بتسمع الشريط,لقيت رئيس أمن العبارة مثلاً أو صحفى محابى للقبطان بيقول فى الشريط للقبطان ولا تقلق يا باشا, إللى خرم العبارة عيل سيس من بتوع السبنسة هنفوخلك أمة,إحنا رجالتنا ملهاش دعوة,مش همة إللى خرموها.

أو تفاجأ بظريف منهم منهمك فى تأكيده إن دى أوشاعات مغرضه الهدف منها ضرب إستقرار العبًاره وإن الركاب عمرهم ما حسوا فى حياتهم بالراحه والإستقرار النفسى إلا فى يوم الخرم بالذات وإن الخرم دة مجرد بير ميه حفروه بتوصيات عالميه.

مايهمنيش أعرف مين بدأ الضرب فى مين الأول, أو مين كان مندس وسط العمال لغرض تخريب وقفتهم السلميه اللى عملوها قبل كده كتير قوى

إللى يهمنى إن فيه ضحايا مصريين من هنا ومن هنا, داحنا بنلوم العراقيين,نقوم نوصل للدرجه دى, طبعا اللوم الأكبر على إللى فى إيده القوة.

على الأقل نفسى أسمع صوت القبطان يقول حاجة, إنشالله يهتى فى أى بطيخ زى بتاع الشريط إللى بيقولولو المركب بتغرق وهوه يقول إعدل السكعه,

بس من الآخر حد يفكرنى كده إيه إللى حصل للعبًاره والقبطان بتاعها.وللأسف الركاب بيروحوا دايماً فى الرجلين, أبوس إديكو فيها إيه لو كلًه لمً الدور ونسيبنا بقى من أرف الأحزاب دى كلها وحبايب قلبى الإخوان أصحاب المواقف البطوليه, ونحافظ كلنا عالعبًارة ونقف على الخرم.لاحسن الخرم كبر قوى, يارب نتٍعظ

أنا متفائل

بعد يوم 6 أبريل, أنا متفائل بالأيام الجاية

فية شوية تعليقات عاوز أقولها:

أولآ واحد من إياهم يقولك الإضراب فشل والناس راحت شغلها عادى, طبعاً إحنا أصلنا هبل وعميان

والتانى يقولك ده الناس منزلتش عشان العواصف الخماسينيه اللى إحنا واخدين عليها وبنروح وبنيجى كل سنه وكل موسم, ده يبقى إسمه تخلف

آخر حاجه فى رأيى إن اللى انكشف ونزل من نظر المحترمين موقف الإخوان, الموقف الساذج إللى فى رأيى إنه موقف خسيس ويدل على الرغبة فى مصلحة الجماعة فقط ومش مصلحة مصر

وحسبيى الله ونعم الوكيل

وبصراحه تامه أنا إبتديت أحس أن فيه أمل وإنى لازم أبطل سلبيه وجبن وادور على حقى وحق ولادى بالقانون اللى ضنايا العادلى بيخوفنا بية, وفاكرها عزبة أبوه ولا دكانه هيرش ميه أدامها عشان العيال تلعب بعيد لاحسن يكسروله الفاترينه

لأ وألف لأ, بالقانون بأه العيال حرة, تلعب فى أى حته يا مش حبيب ولا عدلى

ولو البلد دى فيها قانون كنت تكون أول احد نزيتلو الخابور

بيان الداخلية المستفذ هوة إللى حسسنى أد إية المهانه اللى بيعملونا بيها

خبطت عربية

يا تري إحنا بئينا شعب متبلد المشاعر فعلآ ولاّ دي مجرد غمامه وهتعدي, زيها زي السحابه السوده اللي بتنورنا كل موسم. يا تري فى أمل اننا نبقى ناس كده.....كده..ونعمل وقفه من بتوع ....ديه..هه,,,عارفينها...إللى المصريين وقفوها فمدان سقنكس عند الفسأيه إللي الامن طرأع الاجئين السودانيين جمبها. "حد غتت هيؤللي دة مدان مصطفي محمود ,,, هأووو,, عارف يا ناصح بس القافيه تحكم..ما علينا..نرجع لموضوعنا.. انا بسأل كده ليه بأه,, جربت مره تمسى فالشارع وتبحلق فوشوش الناس "بس من غير ما ياخدو بالهم عشان إنتو فاهمين الإحراج وبتاع" مقصدش الجوع والقرف إللي عالوشوش ..لأ.. ركز في العيون شويه.. مش شايف حاجة؟؟ بالظبط..عيون ميته مفيهاش حياة.. معرفش دة مالقرف العام ولاّ إية,,في رأيي إن دة برووووووووووووووووووود طبيعي عشان نتأقلم مع العيشه الكفر إللي عايشنها,, بالظبط زي الزحلفه لما بتدخل راسها جوة..وبتشتري دماغها..
فكرت إمبارح في إن يمكن نكون فعلا كدة..كدة إية؟؟ زي مالداخلية بتقول شعب بيحب التهزيق..وإللي مبيحبش التهزيُ يبأة بيستاهلو,, طبعا انا بتكلم عالأغلبيه العامه لإن فى ناس محترمين برضو..باقول كده ليه,, أصل إمبارح كنت ماشى عادى بالعربيه وبفكر في أحوال البلد والدنيا,,الدنيا حر شوية,,معلش هشغل التكييف أهو,الشارع زحمه؟أساااااااسى,إنتا ناسى إننا فمصر,,,,وطبعا كبارى الريس عامله شغلها حلاوة وقرفانا اكتر من لجنة سياساتك حتي..ماشى واحدة واحدة عشان مليش مزاج اشد وارخم,,عربيه132 داخله عكس ووقفت لما اعدى عشان دة طريقي,,وفجأة ,, الباشا زهق,,عمل إيه؟دخل فجمب العربيه الوراني,,وزء العربيه ومشى,, طبعا عشان أنا محترم اللى ورايا وبعيب عاللي يركن وسط الشاعر يتخانئ,ركنت يمين ونزلت بسرعه لأني لسه شارى العربية جديد وتمنها حراق أوى,,اللى زهلني إنو حتى مبصش وشايفو ماشي بيحك فعربيات الناس واللة بدون إهتمام.حسبنت وجاي اركب العربية وامشى,,لقيت من بعيد خناقة بين عربجى"مش شتيمة هوة بجد شغلته كدة" وصاحب قهوة,, ركزت شويه طول السكه وانا ماشى بشوف فوشوش الناس..
اللي يغلط وميهونش عليه يعتذر لانه مش متعود على كدة دة مايستاهلش غير حكومه زى دية ولا ريس غير بالشكل دة,, نص بلطجى والتانى مطاطى أو بارد أو مش هامه,,,مش عارف بجد إحنا بإينا كدة إزاى,,ولا هنوصل لحد إية تاني,, مش عارف.
أة,, على فكرة,,العربيه يادوب إتخدشت خدش بسيت.. الحمد للة

ماتأخذونيش عالأخطاء الإملائية اللى موجودة,,أول مرة فحياتى اكتب عربي.

أحلي بدايه بعد بسم الله

على اسم مصر التاريخ يقدر يقول ما شاء
أنا مصر عندي أحب وأجمل الأشياء...
باحبها وهي مالكة الأرض شرق وغرب
وباحبها وهي مرمية جريحة حرب
باحبها بعنف وبرقة وعلى استحياء
وأكرها وألعن أبوها بعشق زي الداء
واسيبها واطفش في درب وتبقي هي في درب
وتلتفت تلقيني جنبها في الكرب
والنبض ينفض عروقي بألف نغمة وضرب

..........صلاح جاهين